Dusse isch äs fiischter wi irä Chue, chaut wieä imene Gotthardschluuch u wiehnächtelig wieä bi de Sibezwärge. Do hanig glatt müesse Güetzele. Amene gmüetleche Sunnti, mit Glögg und Habahusch hani nach vier Johr Schwede oumou gwagt Pepperkakor z bache. Und es isch vei echli glunge, drzue het Wonig no e wuche lang fein gschmöckt, so hanig e wuchelang nid müesse putze.
Das Rezäpt git öppe so um diä hundred Güetzi.
- 2,5 dl bruune Zucker
- 0,75 dl dunkle Invertzucker (flüssig) oder ähnlich
- 0,75 dl Wasser
- 150gr Smör
- 1 Ässlöffu Zimmet (gmahle)
- 1 Ässlöffu Ingwer (gmhale)
- 1 Ässlöffu Kardemumma (gmahle)
- 1 Teelöffäli Nägeli (gmahle)
- 7-8 dl Mäuh
- 1,5 Teelöffeli Bakpuever
Auso bi de Gwürz sötme nid spare, ruhig es Gigguspützli meh isch immer guet.
- Zucker, Invertzucker und Wasser und imenä Pot ufchoche und guet rüehre bis aues verflüssigt isch.
- Dr Smör dr zue gäh und lo schmeuzä. Jitz chaschte t Gwürz drzue mische.
- Guet umrüere während dämm z ganze abchuelet.
- Jitz chaschte z Bachpuever und 7dl Mäuh dr zu gäh und umgusle. Dr Teig ufe chaut Baukon oder i Chüehschrank bis am näschte Tag, oder für die wo wei stresse bis er chaut isch. Take it easy, calm down!
- Dr Ofe uf 175 Grad programiera.
- Mäuh uf e Tisch und dr Teig zimmli dünn uswaue mit em Schleguhouz. Wenn dr Teig chaut isch geits am beschtä.
- Usschtäche mit kuula förmli, und ufenes Bachpapier uf z Bläch leggä. Öppe 6-8 Minute lo bache.
- Ufemene roscht lo abchuele. Finito.
Gueti Güetzi und Gott nytt år!
Struuch